बीड जिल्ह्यातील शिवसैनिकांच्या पाठीशी खंबीरपणे उभा : मुख्यमंत्री

शिवसेनेचे माजी जिल्हाप्रमुख सचिन मुळूक यांच्या भूमिकेचे मुख्यमंत्र्यांकडून कौतुक

By MahaTimes ऑनलाइन | मुंबई

बीड जिल्ह्यातील समाजाचे प्रश्न आपल्या माध्यमातून मांडा, ते सोडविण्याचा नक्की प्रयत्न करू. तसेच जिल्ह्यातील शिवसैनिकांच्या पाठीशी खंबीरपणे उभा राहणार आहे, बीड जिल्ह्यासह मराठवाड्यातील पदाधिकाऱ्यांना लवकरच भेटणार आहे, असे आश्वासन ही मुख्यमंत्री एकनाथ शिंदे यांनी दिले.

शिवसेनेचे माजी जिल्हाप्रमुख तथा जिल्हा नियोजन समितीचे सदस्य सचिन मुळूक यांनी मंगळवारी सायंकाळी मुख्यमंत्री एकनाथ शिंदे यांची सदिच्छा भेट घेतली. यावेळी मुळूक यांनी जाहीर समर्थन दिलेल्या भूमिकेचे मुख्यमंत्र्यांनी कौतुक ही केले. एकनाथ शिंदे म्हणाले, आपली शिवसेना हीच खरी शिवसेना आहे. दरम्यान, मुख्यमंत्रीपदी निवड झाल्याबद्दल एकनाथ शिंदे यांचा सत्कार केला. यावेळी भाजपचे बीडचे तालुकाध्यक्ष स्वप्निल गलधर, उद्योजक बाजीराव चव्हाण आदी उपस्थित होते.

सचिन मुळूक यांचा धाडसी निर्णय

शिवसेनेचे माजी जिल्हाप्रमुख सचिन मुळूक यांनी धाडसी निर्णय घेत मुख्यमंत्री एकनाथ शिंदे यांच्या पाठीशी खंबीरपणे उभा राहणार असल्याचे जाहीर केले. अशी जाहीरपणे भूमिका मांडणारे सचिन मुळूक हे मराठवाड्यातील पहिले पदाधिकारी ठरले. सचिन मुळूक यांच्या संपर्कात असलेल्या जिल्ह्यातील इतर पदाधिकाऱ्यांना देखील मुख्यमंत्री एकनाथ शिंदे हे लवकरच भेटणार आहेत, अशी माहिती आहे.