MahaTimes विविध कार्यक्रम आणि पुस्तक विक्री प्रदर्शनाला दोन दिवसात चांगला प्रतिसाद
By MahaTimes ऑनलाइन |
बीड : बीड ग्रंथोत्सवाच्या माध्यमातून संपावती विद्यालयाच्या प्रांगणात सुरू असलेल्या दोन दिवसीय साहित्य प्रदर्शनाचा समारोप झाला. शालेय विद्यार्थी आणि नागरिकांचा प्रतिसाद लाभलेल्या या ग्रंथोत्सवामध्ये कवी संमेलन, कथाकथन, स्पर्धा परीक्षा मार्गदर्शन यासारखे विविध विषयांवर अभ्यासक, लेखक, साहित्यिक आणि विद्यार्थी बाल साहित्यकारांनी सहभाग घेतला.
आज ग्रंथोत्सवाच्या दुसऱ्या दिवशी दुपारच्या सत्रात स्पर्धा परीक्षेतील तयारी करणाऱ्या विद्यार्थ्यांसाठी मार्गदर्शन पर व्याख्यानाचे आयोजन करण्यात आले होते. यासाठी उपजिल्हाधिकारी डॉ. दयानंद जगताप आणि राष्ट्रपती भवन नवी दिल्ली येथील राष्ट्रपती महोदयांच्या संशोधन कार्यशाळेसाठी विशेष निमंत्रित व अभ्यासक डाॅ.हमराज उईके आणि प्राचार्य श्री.श्रीधर ढास हे उपस्थित होते.
यावेळी उपजिल्हाधिकारी डॉ जगताप यांनी विद्यार्थ्यांना स्पर्धा परीक्षेत यशस्वी होण्यासाठी मार्गदर्शन केले. ते म्हणाले, सातत्यपूर्ण प्रयत्न आणि वाटचालीतूनच स्पर्धा परीक्षातील यशाचा मार्ग दिसतो. वैद्यकीय अधिकारी म्हणून कार्य करत असताना प्रशासकीय सेवेत येऊन स्वतःची ओळख निर्माण करणे आणि लोकसेवेचे काम करणं यासाठी लोकसेवा आयोगाच्या माध्यमातून उपजिल्हाधिकारी म्हणून नियुक्ती होईपर्यंत प्रयत्न करीत राहिलो. प्रशासकीय सेवेत येण्याआधी इतर क्षेत्रात देखील काम केले, प्रशासकीय सेवेच्या माध्यमातून आता समाजासाठी काम करण्याची मोठी संधी या माध्यमातून मला मिळाली आहे, असे उपजिल्हाधिकारी जगताप म्हणाले.
भाषेचे गाढे अभ्यासक डॉ. हमराज उईके म्हणाले, यशस्वी होण्यासाठी आपली विचार प्रक्रिया प्रगल्भ असणे गरजेचे आहे. प्रगल्भ विचारसरणीसाठी भाषेवर प्रभुत्व असल्यास आपण अधिक सक्षमतेने विचार करू शकतो. यासाठी आपली भाषेवर जास्तीत जास्त चांगले प्रभुत्व निर्माण केले जावे ग्रामीण भागातील विद्यार्थ्यांना स्पर्धा परीक्षा किंवा कोणतेही क्षेत्र असेल त्यामध्ये यशस्वी होण्यासाठी भाषा सुधारण्याकडे लक्ष दिले गेले पाहिजे. कारण शेतकरी, मजूर, कामगार असा ग्रामीण भागातील पालकाचा मुलगा भाषेवर प्रभुत्व नसल्याने या स्पर्धेत काहीसा मागे पडतो असे मला वाटते, असे अभ्यासक प्रा.उईके म्हणाले.
ग्रंथोत्सवाच्या समारोपाच्या दुसऱ्या दिवशी सकाळच्या सत्रात विद्यार्थ्यांच्या कथाकथन कार्यक्रमास चांगला प्रतिसाद लाभला. सदर कार्यक्रम मध्ये शांतीवनच्या बाल विद्यार्थी कथाकार सहभागी झाले होते. साक्षी गायकवाड, गायत्री संवडकर, आदिती येडे, प्रतीक्षा जगताप, शुभांगी राख, स्नेहल वाव्हळ आदींचा सहभाग होता. यावेळी भास्कर बडे यांची प्रमुख उपस्थिती होती.
दुपारच्या सत्रात स्पर्धा परीक्षा मार्गदर्शन कार्यक्रमानंतर ग्रंथोत्सवचा समारोप झाला. याप्रसंगी जिल्हा ग्रंथालय अधिकारी संजय मस्के यांनी ग्रंथोत्सव आयोजनासाठी सहभाग दिलेल्या सर्व संबंधितांचे आभार व्यक्त केले. तसेच ग्रंथ संयोजन समितीच्या सदस्यांच्या वतीने या ग्रंथाचा नियोजनात व चंपावती विद्यालयाच्या सहकार्याबद्दल विशेष आभार व्यक्त केले. बीड जिल्हा ग्रंथालय संघाचे अध्यक्ष राजेंद्र सानप यांनी मनोगत व्यक्त केले. यावेळी ग्रंथालय संघाच्या वतीने जिल्हा ग्रंथालय अधिकारी श्री मस्के यांचा स्मृतिचिन्ह व पुष्पगुच्छ देऊन सत्कार करण्यात आला.
