जिल्हा परिषदांच्या गट-गणांचा आरक्षण सोडत कार्यक्रम तूर्त स्थगित

सुधारित आरक्षण सोडत कार्यक्रम यथावकाश देण्यात येईल – राज्य निवडणूक आयोग

By MahaTimes ऑनलाइन | मुंबई

राज्यातील 25 जिल्हा परिषदा व त्यांतर्गतच्या 284 पंचायत समित्यांचा सार्वत्रिक निवडणुकांसाठी देण्यात आलेला आरक्षण सोडत कार्यक्रम सर्वोच्च न्यायालयात आज झालेल्या सुनावणीच्या पार्श्वभूमीवर स्थगित करण्याचा निर्णय राज्य निवडणूक आयोगाने घेतला आहे.

राज्य निवडणूक आयोगाने 5 जुलै 2022 रोजीच्या पत्रान्वये संबंधित जिल्हा परिषदा व त्यांतर्गतच्या पंचायत समित्यांच्या आगामी सार्वत्रिक निवडणुकांसाठी आरक्षण सोडतीचा कार्यक्रम दिला होता. स्थानिक स्वराज्य संस्थांच्या निवडणुकांसंदर्भात सर्वोच्च न्यायालयात दाखल याचिकेसंदर्भात आज सुनावणी झाली. एका आठवड्यानंतर पुढील सुनावणी होणार आहे.

या पार्श्वभूमीवर मंगळवारी राज्य निवडणूक आयोगाने आदेश काढले आहे. मुंबई, मुंबई उपनगर, पालघर, ठाणे, धुळे, नंदूरबार, अकोला, वाशिम, नागपूर भंडारा आणि गोंदिया वगळून आरक्षण सोडतीला स्थगिती दिली आहे. उद्या 13 जुलै रोजी ही आरक्षण सोडत निघणार होती.

सुधारित आरक्षण सोडत कार्यक्रम यथावकाश देण्यात येईल, असे राज्य निवडणूक आयोगाने नमूद केले आहे.