MahaTimes By MahaTimes ऑनलाइन | बीड
एतेमाद उर्दू दैनिकाचे बीड जिल्हा प्रतिनिधी प्रा. जावेद पाशा यांच्या निवासस्थानी शुक्रवारी शीरखुर्मा पार्टीचे आयोजन करण्यात आले होते. यावेळी महाराष्ट्र राज्य मराठी पत्रकार संघाचे प्रदेशाध्यक्ष वसंत मुंडे, उर्दू दैनिक तामिर चे संपादक तथा वरिष्ठ पत्रकार काझी मगदूम, पत्रकार संघाचे विभागीय अध्यक्ष वैभव स्वामी, इन्साफ व महाटाइम्स चे संपादक रईस खान यांची प्रमुख उपस्थिती होती.
यावेळी सर्व मान्यवरांनी शीरखुर्मा व अन्य पदार्थांचा आस्वाद घेतला. यावेळी उपस्थित पत्रकारिता क्षेत्रातील दिग्गजांनी जिल्ह्यातील पत्रकारिता क्षेत्रासह राजकीय, सामाजिक स्थिती, जिल्ह्यातील कायदा व सुव्यवस्था या सर्व विषयावर सविस्तर चर्चा केली. भोंग्यावरून राज्यातील निर्माण झालेले वातावरणात देखील जिल्ह्यात रमजान ईद व इतर सण-उत्सवात हिंदू मुस्लिम ऐक्याचे दर्शन घडत असल्याने उपस्थितांनी जिल्हावासीयांचे कौतुक केले. दरम्यान प्रा. जावेद पाशा यांनी सर्व मान्यवरांचे स्वागत केले.
पत्रकार संघाच्या ‘ईद मिलाप’ला सर्वत्र मोठा प्रतिसाद
बीड जिल्हा पत्रकार संघाचा ईद मिलाप चा कार्यक्रम नुकताच वसंत मुंडे, संतोष मानुरकर यांच्या प्रमुख उपस्थितीत पार पडला. गर्गे स्मारक येथे पार पडलेल्या या कार्यक्रमात श्री. मुंडे यांनी कार्यक्रमाचे कौतुक करून हा उपक्रम राज्यभर राबविण्याचा निर्णय घेतला होता. त्यानुसार मराठवाडासह राज्यातील सर्व जिल्ह्यात महाराष्ट्र राज्य मराठी पत्रकार संघाच्यावतीने ईद मिलाप कार्यक्रमाचे आयोजन करण्यात येत आहे. या कार्यक्रमांना सर्वत्र मोठा प्रतिसाद मिळत आहे.
