ईद मुबारक! जिल्हाभरात रमजान ईद मोठ्या उत्साहात साजरी

अनेक ठिकाणी हिंदू-मुस्लिम ऐक्याचे दर्शन घडले, राज्यातील परिस्थिती लक्षात घेता जिल्ह्यात चोख पोलिस बंदोबस्त

By MahaTimes वेब टीम | बीड

सोमवारी चंद्र दर्शन झाल्या नंतर मंगळवारी देशभरातील मुस्लिमांचा सर्वात मोठा व पवित्र असा ‘ईद उल फित्र’ अर्थात ‘रमजान ईद’, यंदा कोरोनाबाबतचे सर्व निर्बंध हटवले गेल्यामुळे आज दोन वर्षांनंतर मोठ्या उत्साहात व आनंदात साजरी होत आहे. दरम्यान आज ईद सण साजरा होत असताना व राज्यातील परिस्थिती लक्षात घेता पोलिसांकडून शहरात व जिल्ह्यात कडक बंदोबस्त ठेवण्यात आला होता.

मुस्लिम बांधवांचा पवित्र असा रमजान महिना पूर्ण झाल्यानंतर, नमाज पठण करून ईद मोठ्या उत्साहात साजरी करण्यात येत आहे. आज सकाळी सार्वजनिक नमाज पठण करण्यासाठी बीड येथील ऐतिहासिक इस्लामपुरा ईदगाह आणि बालेपीर नवीन ईदगाह मैदानावर शहरातील हजारो मुस्लिम बांधव जमले होते. नमाज पठण झाल्यानंतर सर्वानी एकमेकांना ईद च्या शुभेच्छा दिल्या.

ईद निमित्त शहरातील मोठ्या मस्जीदीत सामुदायिक नमाज अदा

आज रमजान ईद निमित्त बीड शहरासह जिल्हाभरात ईदगाह सह सर्व मोठ्या मस्जीदीत सामुदायिक नमाज अदा करण्यात आली. बीड शहरातील बालेपीर नई ईदगाह, इस्लामपुरा पुरानी ईदगाह या दो मोठ्या ईदगाह सह तकीया मस्जिद, मरकज मस्जीद राजुरीवेस, मदरसा दरु लउलूम बीड, बालेपीर दर्गाह मस्जिद, एक मिनार मस्जिद बालेपिर, केजीएन मस्जिद, कुरेशी मस्जिद, मोमीनपूरा, मदिना मस्जिद, जकेरिया मस्जिद, काली मस्जिद, बारादरी मस्जिद, कादरपाशा मस्जिद कारंजा मस्जिद, जामा मस्जिद आदि ठिकाणी मुस्लिम बंधुंनी ईद निमित्त सामुदायिक नमाज अदा केली.

शहरातील पेठ बीड भागातील जुनी ईदगाह येथे सामुहिक नमाज अदा केल्यानंतर सर्व मुस्लीम बांधवांना मा.नगराध्यक्ष डॉ.भारतभूषण क्षीरसागर यांनी भेटुन शुभेच्छा दिल्या.

याप्रसंगी जिल्हाधिकारी राधाबिनोद शर्मा, जिल्हा पोलीस अधिक्षक पंकज देशमुख, सुशिलाताई मोराळे, ईलियास भाई, विकास जोगदंड, मुन्ना ईनामदार, अमोल पौळ, बंडु निसर्गंध, रुस्तुम बेद्रे, भागवत बादाडे यांच्यासह समाज बांधव उपस्थित होते.

सोमवारी चॉंद दिसल्यानंतर ईद च्या निमित्ताने मंगळवारी आनंदी, उत्साही वातावरण निर्माण झाले. या पवित्रदिनी शहरातील सर्व मुस्लीम बांधवांना माजी मंत्री जयदत्त क्षीरसागर यांनी सामूहीक नमाज अदा केल्यानंतर भेटून रमजान ईदच्या शुभेच्छा दिल्या.

नवी ईदगाह बालेपीर येथे आमदार संदीप क्षीरसागर यांनी उपस्थित राहुन मुस्लिम बांधवांना रमजान ईदच्या शुभेच्छा दिल्या. यावेळी माजी माजी आ. सुनील धांडे, नगरसेवक शेख मोहसीन आदि.

गेवराई येथील इदगाह मैदानावर मुस्लीम बांधवांनी नमाज पठण करुन उत्साहात ईद साजरी केली. ईदनिमित्त मा. आमदार अमरसिंह पंडित, जि.प. चे मा. अध्यक्ष विजयसिंह पंडित यांनी मुस्लीम बांधवांना शुभेच्छा दिल्या.

चोख पोलिस बंदोबस्त

रमजान ईदच्या पार्श्वभूमीवर बीड जिल्ह्यात शांतता आबाधीत रहावी, याकरिता पोलिस अधीक्षक पंकज देशमुख यांच्या मार्गदर्शनाखाली चोख पोलिस बंदोबस्त ठेवण्यात आला होता.

दोन अप्पर पोलिस अधीक्षक, पाच डीवायएसपी, 22 पोलिस निरीक्षक, 55 सहाय्यक पोलिस निरीक्षक, 74 पोलिस उपनिरीक्षक, 1365 पोलिस कर्मचारी, आरसीपी जवान 100, एसआरपी जवान 200 आणि होमगार्ड 650 असा एकूण 2474 पोलिस कर्मचार्यांचा तगडा बंदोबस्त ठेवण्यात आला होता. पोलिस अधीक्षक श्री. देशमुख स्वत: परिस्थितीवर नियंत्रण ठेवुन होते.