दबक्‍या पावलाने हुकूमशाही येत आहे

जयभिम महोत्सव : डॉ. ऋषिकेश कांबळे यांचे परखड प्रतिपादन

By MahaTimes ऑनलाइन – बीड |

आपल्या आजूबाजूचे सामाजिक, सांस्कृतिक, राजकीय वातावरण चिंतीत करणारे आहे. जात-धर्माच्या नावावरून पसरवला जाणारा तेढ ही लोकशाही नसून दबक्‍या पावलाने हुकूमशाही (Dictatorship) येत आहे, अशा शब्दांत प्रसिद्ध साहित्यिक डॉ. ऋषिकेश कांबळे यांनी चिंता व्यक्त केली. हुकूमशाहीचे रूप पुतना मावशीसारखे असते. ती आकर्षक वाटते; पण विष ओकते, असेही ते म्हणाले.

डॉ. बाबासाहेब आंबेडकर (Dr. Babasaheb Ambedkar) यांच्या १३१ व्या जयंतीनिमित्त सार्वजनिक जयंती उत्सव समिती बीडकडून विविध कार्यक्रमांचे आयोजन करण्यात आले आहे. त्या अनुषंगाने रविवार (ता.१०) रोजी भारतीय लोकशाहीचे भवितव्य या विषयावर आयोजित केलेल्या व्याख्यानमालेत प्रसिद्ध साहित्यिक डॉ. ऋषिकेश कांबळे उपस्थितांना संबोधित करताना बोलत होते. या कार्यक्रमाच्या अध्यक्षस्थानी डेप्युटी सीईओ चंद्रशेखर केकाण यांची उपस्थिती होती.

उपस्थितांना संबोधित करताना प्रसिद्ध साहित्यिक डॉ.ऋषिकेश कांबळे म्हणले की, आपल्या आजूबाजूला भय नाही असे वारंवार सांगितले जात आहे. मग इतके भयकंपित वातावरण का घोंघावत आहे, देशाचे सामाजिक स्वास्थ्य बिघडल्यासारखे का वाटत आहे, अनेक समाजसमूहाला असुरक्षित का वाटत आहेत, याचा नीट विचार झाला पाहिजे. माणूस संपविण्याचे कटकारस्थान चालू आहे. आजघडीला भारतीय लोकशाहीचे भविष्य धोक्यात आहे. सत्तेच्या चाव्या ह्या मोजक्याच लोकांच्या हाती आहेत. त्यामुळे बहुजनांचे वाटोळे होत आहे, माणसे सज्ञान होऊ नयेत, ती अंधश्रद्धेच्या कोंडवाड्यात राहावीत असे प्रयत्न सुरू आहेत. त्यामुळे आंबेडकरी चळवळीने अजून सावध राहिले पाहिजे. असे परखड मत प्रसिद्ध साहित्यिक डॉ. ऋषिकेश कांबळे यांनी व्यक्त केले.

या व्याख्यान मालेचे प्रास्ताविक केशव आठवले यांनी केले. सूत्रसंचालन अ‍ॅड. वाघमारे, आभार कॅप्टन अनुरथ वीर यांनी मानले. हा कार्यक्रम यशस्वीरित्या पार पाडण्यासाठी डॉ. बाबासाहेब आंबेडकर सार्वजनिक जयंती उत्सव समिती यांच्यासह आंबेडकरी कार्यकर्त्यांनी मोलाचे परिश्रम घेतले. या कार्यक्रमाला आंबेडकरी जनसमुदाय मोठ्या संख्येने उपस्थित होता.

आज भिमगीत संगीत रजनी

आज मंगळवार (ता.12) रोजी शहरातील छत्रपती संभाजी महाराज (Chhatrapati Sambhaji Maharaj) क्रीडांगण, शिवाजी महाराज चौक बीड येथे सायंकाळी 6 ते 12 या वेळेत इंडियन आयडॉल अभिजित कोसंबी आणि संच यांचा भिमगित संगीत रजनी कार्यक्रम होणार आहे.