अद्भुत, अविस्मरणीय, ऐतिहासिक शिवजन्मोत्सव सोहळा !

By MahaTimes ऑनलाइन – बीड |

छत्रपती शिवाजी महाराज यांची 392 वी जयंती जिल्हाभरात मोठ्या उत्साहात साजरी करण्यात आली. बीडकरांनी ऐतिहासीक शिवजन्मोत्सव सोहळा अनुभवला. शिवतेजाने बीडचा सारा आसमंत उजळून निघाला. जय भवानी जय शिवाजी , जय जिजाऊ जय शिवराय अशा गगनभेदी जयजयकारात छत्रपती शिवाजी महाराजांना अभिवादन करण्यात आला.

 शासकीय महापुजा

 जय भवानी जय शिवाजी , जय जिजाऊ जय शिवराय अशा गगनभेदी जयजयकारात छत्रपती शिवाजी महाराजांना अभिवादन करण्यात आले. आज सकाळी आ.संदीप क्षीरसागर, जिल्हाधिकारी राधाबिनोद शर्मा , पोलिस अधिक्षक आर . राजा, उपविभागीय अधिकारी नामदेव टिळेकर, शल्यचिकित्सक डॉ . सुरेश साबळे, माजी आ . सय्यद सलीम, माजी आ.सुनिल धांडे, शिवजयंती उत्सव समितीचे अध्यक्ष जिवन जोगदंड, उपाध्यक्ष खुर्शीद आलम, मुंबई बाजार समितीचे सभापती अशोक डक आदींसह शिवभक्तांच्या उपस्थितीत शासकीय महापुजा करण्यात आली. दरम्यान काल मध्यरात्री झालेल्या ऐतिहासीक लेझर शो ने बीडकरांच्या डोळ्यांचे पारण फेडले.

क्षीरसागरांचे सहकुटुंब छत्रपती शिवाजी महाराजांना अभिवादन

छत्रपती शिवाजी महाराज यांच्या जयंतीनिमित्त नगराध्यक्ष डॉ.भारतभूषण क्षीरसागर, प्रा.दीपा क्षीरसागर, युवा नेते डॉ.योगेश क्षीरसागर, डॉ.सारिका क्षीरसागर यांनी शिवरायांच्या पुतळ्यास पुष्पहार घालून अभिवादन केले.

शिवजयंतीनिमित्त सर्व शिवप्रेमींना भगवे फेटे बांधून शिवाजी महाराज पुतळ्याच्या परिसरात मिरवणूक काढण्यात आली. यावेळी पारंपारिक ढोल ताशे, तुतारींच्या गगनभेदी गर्जना, जिजाऊंच्या आणि शिवरायांच्या जय जयकार च्या घोषणेने परिसर दणाणून गेला होता. जयंतीनिमित्त शेकडो शिवभक्त यावेळी पारंपारिक पोशाखात मिरवणुकीत सहभागी झाले होते. तसेच डॉ.योगेश क्षीरसागर यांच्यासंकल्पनेतून जयंतीनिमित्त पुतळ्याच्या परिसरात उभारण्यात आलेल्या सेल्फी देखाव्या समोर शिवरायांच्या ऐतिहासिक ठेव्यासोबत शेकडो कुटुंबांनी आपल्या परिवारासह सेल्फी, फोटो काढले. शिवप्रेमींनी या उपक्रमाचे कौतुक करत डॉ.योगेश क्षीरसागर यांचे आभार मानले. याप्रसंगी डॉ.योगेश क्षीरसागर यांनी सर्व शिवभक्त आणि शिवप्रेमींना जयंतीनिमित्त शुभेच्छा दिल्या.

गेवराईत दिमाखदार सोहळ्यात शिवजन्मोत्सव साजरा

गेवराई- राष्ट्रवादी सार्वजनिक शिवजन्मोत्सव सोहळा समितीच्या वतीने गेवराई शहरात शिवजन्मोत्सवाचे दिमाखदार आयोजन करण्यात आले. पंधरा हजार चौरस फुटामध्ये साकारलेल्या शिवप्रतिमेचे मुख्य आकर्षण ठरलेल्या सोहळ्यात माजी आमदार अमरसिंह पंडित यांच्या हस्ते शिवप्रतिमा पुजन आणि महाआरतीचे आयोजन करण्यात आले. या प्रसंगी उपस्थित शिवप्रेमींना विजयसिंह पंडित यांच्या संकल्पनेतुन साकारलेल्या छत्रपती शिवाजी महाराजांचे रेखाचित्र भावले, चित्रकार उद्देश पघळ आणि सुनिल बेले यांचा सत्कार या निमित्ताने करण्यात आला. रेखाचित्राचे आनावरण माजी आमदार अमरसिंह पंडित यांच्या शुभहस्ते करण्यात आले. या प्रसंगी शिवप्रतिमेचे पुजन आणि महाआरतीचे आयोजन करण्यात आले.

सोहळा समितीच्या वतीने जयभवानी मंदिर, शिवाजीनगर येथुन रात्री शिवज्योतीचे आयोजन करण्यात आले. गेवराई शहरातील मिरवणुक मार्गावरील विविध चौकात शिवप्रेमी नागरीकांनी रात्री बाराच्या सुमारास शिवज्योतीचे उत्साहात स्वागत केले. शालेय विद्यार्थी, महिला यांसह शिवप्रेमी नागरीकांनी शिवजन्मोत्सव सोहळ्याला हजेरी लावली. ड्रोनच्या माध्यमातुन मोठ्या पडद्यावर रेखाचित्राचे थेट प्रक्षेपण समितीच्या वतीने करण्यात आले. विजयसिंह पंडित आणि त्यांच्या सहकार्‍यांचे शिवप्रेमी नागरीकांनी अभिनंदन केले. सोहळा यशस्वी करण्यासाठी राष्ट्रवादी शिवजन्मोत्सव सोहळा समितीचे अध्यक्ष महेश मोटे, कार्याध्यक्ष विठ्ठल पवार, सह कार्याध्यक्ष सरवर पठाण, प्रथमेश वाव्हळ, किशोर वादे, शेख बाबुभाई (जेके), सचिव गजानन पिसाळ, सहसचिव वैभव दाभाडे, कोषाध्यक्ष आकाश पवार सह कोषाध्यक्ष शेख जुनेद यांच्यासह सहकार्‍यांनी परिश्रम घेतले. यावेळी गेवराई तालुक्यातील शिवप्रेमी नागरीक मोठ्या संख्येने उपस्थित होते.

परळीत ना. धनंजय मुंडेंच्या हस्ते भगवा ध्वज फडकावून अभिवादन

परळी : परळीत ना. धनंजय मुंडे यांच्या हस्ते भगवा ध्वज फडकावून व छत्रपती शिवरायांच्या अश्वारूढ पुतळ्यास हार अर्पण करून ‘जय जिजाऊ – जय शिवराय’ च्या जयघोषात परळी येथील छत्रपती शिवाजी महाराज चौकात नाथ प्रतिष्ठाणच्या वतीने शिवजयंती साजरी करण्यात आली.

छत्रपती शिवाजी महाराज चौकाच्या भोवती शिवजयंतीच्या निमित्ताने ज्याप्रमाणे सुशोभीकरण करून गड-किल्ल्यांच्या प्रवेशद्वाराची प्रतिकृती साकारली आहे, तशाच स्वरूपाचे प्रवेशद्वार याठिकाणी उभे करून चौक व परिसराचे सुशोभीकरण करण्याचा निर्धार धनंजय मुंडे यांनी आज परळी येथील शिवजयंती कार्यक्रमात बोलताना व्यक्त केला आहे. यावेळी जिल्हा परिषद गटनेते अजय मुंडे, न. प. गटनेते वाल्मिक कराड, राष्ट्रवादी काँग्रेस शहराध्यक्ष बाजीराव धर्माधिकारी, माणिकभाऊ फड, रा.कॉ. चे तालुकाध्यक्ष लक्ष्मण पौळ, पंचायत समिती सभापती पिंटू मुंडे, युवा नेते अभय मुंडे, शंकर कापसे, सुरेश नानवटे, अमित केंद्रे, अमर रोडे, सुरज पाटील, बाबुशा कदम, ऍड मनजीत सुगरे, गोविंद कराड, संदीप दिवटे, गणेश सुरवसे यांसह मान्यवर उपस्थित होते.