बीडमध्ये होणार शंभरावे विभागीय नाट्य संमेलन

स्वागताध्यक्ष डॉ. योगेश क्षीरसागर, डॉ. दीपाताई क्षीरसागर यांची माहिती

By MahaTimes ऑनलाइन |

बीड : अखिल भारतीय नाट्य संमेलनाचे अध्यक्ष जब्बार पटेल यांच्या मार्गदर्शनाखाली बीडमध्ये शंभरावे विभागीय नाट्य संमेलन होत आहे. या संमेलनाचे उद्घाटन समारंभ दि.2 फेब्रुवारी रोजी सकाळी 10.30 वाजता शहरातील माने कॉम्प्लेक्ससमोरील पारसनगरी मैदानावर (स्व.केशरबाई क्षीरसागर नाट्यनगरी, स्व.सुहासिनी इर्लेकर रंगमंच -मुख्यमंच) होणार आहे. ४ मंत्री, दिग्गज सिनेकलाकार, नेते मंडळींची उपस्थिती राहणार आहे, अशी माहिती नाट्य संमेलनाचे स्वागताध्यक्ष डॉ. योगेश क्षीरसागर, नाट्य परिषदेच्या बीड शाखा अध्यक्ष डॉ. दीपाताई क्षीरसागर यांनी दिली.

नाट्यसंमेलनाच्या पार्श्वभूमीवर बीडमध्ये शनिवारी (दि.२७) आयोजित पत्रकार परिषदेत ते बोलत होते. पुढे बोलताना त्यांनी सांगितले की, नाट्य संमेलनाचे उद्घाटक कृषी मंत्री तथा पालकमंत्री ना. धनंजय मुंडे हे असतील. भाजपच्या राष्ट्रीय सचिव तथा माजी मंत्री पंकजा मुंडे यांची विशेष उपस्थिती असणार आहे. प्रमुख अतिथी म्हणून नाट्य परिषदेचे विश्वस्त तथा उद्योगमंत्री उदय सामंत, महिला व बालकल्याण मंत्री आदितीताई तटकरे, क्रीडा युवक कल्याण व बंदरे मंत्री संजय बनसोडे, विश्वस्त तथा माजी नाट्य परिषदेचे अध्यक्ष मोहन जोशी, अखिल भारतीय मराठी नाट्य परिषदेचे अध्यक्ष प्रशांत दामले, आमदार सतीश चव्हाण, आ.प्रकाश सोळंके, आ.सुरेश धस, आ.बाळासाहेब आजबे, आ.लक्ष्मण पवार, आ.नमिता मुंदडा, माजी राज्यमंत्री सुरेश नवले, माजी आमदार अमरसिंह पंडित, जिल्हाधिकारी दीपा मुधोळ-मुंडे, पोलीस अधीक्षक नंदकुमार ठाकूर, मुख्य कार्य अधिकारी अविनाश पाठक, मुख्याधिकारी निता अंधारे, नाट्य परिषदेचे कार्यवाह अजित भुरे, उपाध्यक्ष भाऊसाहेब भोईल, सुप्रसिद्ध अभिनेते सचित पाटील, उपाध्यक्ष नरेश गडेकर, सुप्रसिध्द अभिनेत्री गौरी कुलकर्णी, सहकार्यवाह समीर इंदुलकर, कोषाध्यक्ष सतीश लोटके, अंबाजोगाई नाट्य परिषद अध्यक्ष राजकिशोर मोदी, ज्येष्ठ अभिनेत्री सविता मालपेकर, सहकार्यवाह दिलीप कोरके, परळी नाट्य परिषदेचे अध्यक्ष बाजीराव धर्माधिकारी, सहकार्यवाह सुनिल ढगे आदींची उपस्थिती असणार आहे.

नाट्य संमेलनाचे अध्यक्ष जब्बार पटेल यांच्या मार्गदर्शनाखाली आणि माझ्या आई डॉ. दिपाताई क्षीरसागर यांच्या नियोजनातून विभागीय नाट्य संमेलन होत आहे. या नाट्यसंमेलनानिमित्त भरगच्च सांस्कृतिक कार्यक्रम होणार आहेत. बीडकर आणि जिल्हावासियांसाठी ही सांस्कृतिक मेजवानी असणार आहे. नाट्यकलेचा जागर व व्यावसायिक नाटके, कलावंत रजनी, संगीत नाट्यपद, प्रवेश, लावणी महोत्सव, महाराष्ट्रातील लोकधारा अशा भरगच्च कार्यक्रमांचा बीडकरांनी लाभ घ्यावा, असे आवाहन नाट्य संमेलनाचे स्वागताध्यक्ष डॉ. योगेश क्षीरसागर, नाट्य परिषदेच्या बीड शाखा अध्यक्ष डॉ. दीपाताई क्षीरसागर यांच्यासह नाट्य परिषदेच्या पदाधिकारी, सदस्यांनी केले.

दिग्गज कलाकारांची राहणार उपस्थिती
प्रशांत दामले, मकरंद अनासपुरे, दिग्दर्शक चंद्रकांत कुलकर्णी, सचित पाटील, गौरी कुलकर्णी, निलम शिर्के सामंत, विशाखा सुभेदार, प्रियदर्शन जाधव, पंढरीनाथ कांबळे (पॅडी), संदीप पाठक, सोनाली कुलकर्णी, भार्गवी चिरमुले, राजेश्वरी खरात, श्वेता खरात, जुई बेनखळे, विदिशा मसकर, अंशुमन विचारे, कमलाकर सातपुते, आनंदी जोशी, मयुर सुकाळे, सावनी दातार, सुदीप सबनीस, निनाद जाधव, डॉ.गणेश चंदनशिवे, माया खुटेगावकर, पुनम कुडाळकर, अर्चना सावंत, अर्चना जावळेकर, दिप्ती आहेर, संगीता लाखे, शुभम बोराडे (बीड), अनामिका आहिरे (बीड), सुशांत शेलार या दिग्गज कलाकारांची उपस्थिती राहणार आहे.

असे आहेत कार्यक्रम
नाट्य संमेलनाच्या कार्यक्रमाची सुरूवात ही दि.1 फेब्रुवारी रोजी सकाळी 10 वाजता यशवंतराव चव्हाण नाट्यगृहात माजी नगराध्यक्ष डॉ.भारतभूषण क्षीरसागर यांच्या हस्ते उद्घाटन करून करण्यात येईल. दुपारी 11 वाजता गेवराई तालुक्यातील शाहीर विलास सोनवणे प्रस्तुत नागलोक टिपरे नृत्य (एक पारंपारिक युद्व कला) सादर करण्यात येईल. दुपारी 12 वाजता माजलगाव तालुका एकपात्री, संवादिनी व तबला वादन, नृत्य भरतनाट्य व नाट्यसंगीत; दुपारी 2 वाजता कडा, आष्टी, पाटोदा, शिरूर कासार तालुका; दुपारी 3 वाजता बीड तालुका व शहरातील विविध डान्स क्लासेसचे समुहनृत्य कैलास शिंदे, सिद्वार्थ अग्रवाल, राधाकृष्ण वाघ; सायंकाळी 5 वाजता परळी तालुका दोन अंकी नाटक पुरूष गाळणार्‍या बायकांचा गाव लेखक श्याम पेठकर, दिग्दर्शक प्रदीप भाकरे हे सर्व कार्यक्रम यशवंतराव चव्हाण नाट्यगृह, स्व.मधुकरराव गोडसे रंगमंच, बीड येथे होतील. तर मुख्यमंचावर सायंकाळी 6 वाजता जागृती मंगळागौर ग्रुप अनुराधा खरवडकर, बीड; सायंकाळी 7 वाजता लावणी महोत्सव या महोत्सवाचे उद्घाटन राष्ट्रवादी काँग्रेसचे बीड जिल्हाध्यक्ष ॲड.राजेश्वर चव्हाण, ज्येष्ठ नेते वाल्मिक कराड यांच्या हस्ते होणाार आहे.

यावेळी महाराष्ट्रातील सुप्रसिध्द लावणी नृत्यांगणा आपली लावणी सादर करतील. सादरकर्ते-माया खुटेगावकर, पुनम कुडाळकर, अर्चना सावंत, अर्चना जावळेकर, दिप्ती आहेर, संगीता लाखे, मुख्य आकर्षण शुभम बोराडे, अनामिका आहिरे हे असणार आहेत. वरील दोन्ही कार्यक्रम स्व.सुहासिनी इर्लेकर रंगमंच (मुख्यमंच) पारस नगरी, माने कॉम्प्लेक्स,बीड या ठिकाणी होणार आहेत. दि.2 फेबृुवारी 2024 रोजी नाट्य संमेलनाची सुरूवात सकाळी 8 वाजता नाटयदिंडीने होईल. या नाट्य दिंडीत बीड शहरातील सर्व शाळा, महाविद्यालये, विविध नाट्य संस्था, मुंबई, पुणे येथील कलावंत, नियामक मंडळ सदस्य उपस्थित राहणार आहेत. सकाळी 10 वाजता शास्त्रीय नृत्य नुपूर नृत्य अकादमी (सौ.अनुराधा चिंचोलकर) सकाळी 10.30 वाजता मुख्य उद्घाटन सोहळा संपन्न होईल. दुपारी 1.00 वाजता मराठी पाऊल पडते पुढे (महाराष्ट्राची लोकधारा) यामध्ये मुंबईचे कलावंत सहभागी होतील.

यात तीस कलावंताचा सहभाग आहे. वासुदेव ते भैरवी असा लोकसंगीताचा प्रवास असणार आहे. दुपारी 2.30 वाजता वर्‍हाड निघालयं लंडनला (एकपात्री नाटक) सादरकर्ते संदीप पाठक, मुंबई प्रसिध्द नाटककार लक्ष्मण देशपांडे यांनी अजरामर केलेली कलाकृती आहे. दुपारी 4.15 वाजता संगीत नाट्य पद प्रवेश, पुणे येता उषःकाल हा! संगीत नाट्य परंपरेतील काही प्रवेश व नाट्यगीते यात असणार आहेत. दुपारी 5.15 वाजता कलावंताशी गप्पा – नाटकातील नाटक यामध्ये चंद्रकांत कुलकर्णी, मकरंद अनासपुरे, प्रशांत दामले, गणेश चंदनशिवे, सचित पाटील, गौरी कुलकर्णी या कलावंत मंडळीचा सहभाग असेल. सायंकाळी 6 वाजता हस्तांतरण समारंभ आयोजित करण्यात आला आहे.

यात नटराज मुर्ती, संहिता आणि नाटकाची घंटा हे लातूर येथे होणार्‍या संमेलनासाठी हस्तांतरित केली जाणार आहे. सायंकाळी 7 वाजता संगीत रजनी हा कार्यक्रम होईल. नाट्य, संगीत नृत्य अशी बहारदार संगीत रजनी सुमारे चाळीस कलावंत सादर करणार आहेत. यामध्ये सोनाली कुलकर्णी, भार्गवी चिरमुले, राजेश्वरी खरात, श्वेता खरात, जुई बेनखळे, विदिशा मसकर, अंशुमन विचारे, कमलाकर सातपुते, आनंदी जोशी, मयुर सुकाळे हे कलावंत आपली कला सादर करतील. हे सर्व कार्यक्रम हे स्व.सुहासिनी इर्लेकर रंगमंच (मुख्यमंच) पारस नगरी मैदान येथे होतील.

उद्घाटनानंतर दुसऱ्या दिवशी दि.2 फेब्रुवारी रोजी यशवंतराव चव्हाण नाट्यगृह (स्व.मधुकरराव गोडसे रंगमंच) येथे दुपारी 1 वाजता एकपात्री प्रयोग (03) नाट्यजागर मध्ये प्रथम येणारे तीन एकपात्री,बालनाट्य सादर होणार आहे. दुपारी 1.30 वाजता अंबाजोगाई तालुका बालनाट्य, नांदीगीते, नृत्यनाटिका. दुपारी 3 वाजता एकांकिका 1) गोदा (नाट्यशास्त्र विभाग, सौ. के. एस. के. महाविद्यालय, बीड), 2) नवस (प्रगती सेवाभावी संस्था, पाडळी), 3) इदंनममू (सादरकर्ते अ.भा.म.ना.प. शाखा बीड); सायंकाळी 5.30 वाजता संगीत रजनी सादरकर्ते संगीत विभाग सौ.के.एस.के. महाविद्यालय, बीड; रात्री 9 वाजता व्यवसायिक नाटक कुर्रर्र… लेखक दिग्दर्शक प्रसाद खांडेकर असून विशाखा सुभेदार, प्रिदर्शन जाधव, मयुरा रानडे, पंढरीनाथ (पॅडी) कांबळे हे कलावंत सादर करणार आहेत.