MahaTimes जिजाऊ मल्टीस्टेट घोटाळ्यात तक्रारदार व साक्षीदार यांना आरोपी करण्याचा दाखवला धाक
आर्थिक गुन्हे शाखेचे निरीक्षक खाडे, सहा. फौजदार व खाजगी इसमा वर ‘एसीबी’ चा फास
By MahaTimes ऑनलाइन |
बीड : येथील जिजाऊ मल्टीस्टेटच्या गुन्ह्यात आरोपी न करण्यासाठी एका बिल्डरकडून एक कोटी रूपयांची लाच मागितली. त्यातील पहिला हप्ता पाच लाख रूपये खासगी इसमास (व्यापारी) देण्यास सांगितले. लाच स्विकारताच व्यापाऱ्याला बेड्या ठोकल्या. या प्रकरणी लाचेची मागणी केल्या प्रकरणी आर्थिक गुन्हे शाखेचे पोलिस निरीक्षक हरिभाऊ खाडे आणि प्रोत्साहन देणारा सहायक फौजदार अशा तिघा जणाविरुद्ध शहर ठाण्यात गुन्हा दाखल करण्याची कारवाई सुरू आहे. बीडच्या एसीबीने बुधवारी सायंकाळी बीड शहरातील सुभाष रोडवर ही कारवाई केली. दोनीही आरोपी लोकसेवक फरार आहेत.
यातील तक्रारदार आणि त्याचा खाजगी चालक यांनी मासाहेब जिजाऊ मल्टी स्टेट बँकेचे संस्थापक संचालक बबन शिंदे यांचे शाळेच्या ईमारती च्या बांधकामा करीता मटेरीअल पुरवले होते. मोबदला म्हणुन ६० लाख रुपये बबन शिंदे यांनी तक्रारदार व साक्षीदार यांना दिले होते. बॅंक अपहार प्रकरणी बबन शिंदे व इतरांवर पोलीस स्टेशन शिवाजी नगर बीड येथे गुन्हा नं ३६०/२३ दाखल असुन तपास पोनी. खाडे आर्थिक गुन्हेशाखा बीड हे करत आहेत. यातील तक्रारदार व साक्षीदार यांना बबन शिंदे याने दिलेली ६० लाख रक्कम बॅंक अपहारातील आहे असे भासवून नमुद गुन्ह्यांत तक्रारदार व साक्षीदार यांना आरोपी करण्याचा धाक दाखवून तसेच तक्रारदार व साक्षीदार यांची मालमत्ता जप्त करण्याची भिती दाखवून यातील आरोपी लोकसेवक जाधवर यांनी तक्रारदार यांचेकडे स्वत:साठी एक लाख रुपये मागणी करुन पोनी खाडे यांना लाच रक्कम मिळुन देण्यासाठी प्रोत्साहन दिले तसेच पोनी खाडे यांनी तक्रारदार व साक्षीदार यांना प्रत्येकी ५० लाख या प्रमाने १ कोटी रुपये लाचेची मागणी करुन तडजोड अंती ३० लाख रुपये स्विकारण्याचे मान्य केले.
तसेच तक्रारदार यांचेकडुन पहीला हप्ता म्हणुन ५ लाख रुपये खाजगी इसम कुशाल जैन मौजकर टेक्सटाईल यांचेकडे देण्यास सांगितले . त्यावरुन बुधवार, १५ मे रोजी मौजकर टेक्सटाईल सुभाष रोड बीड येथे कारवाईसाठी सापळा लावला आणि खाजगी इसम कुशाल जैन याने पोनी हरिभाऊ खाडे यांचे सांगण्यावरून तक्रारदार यांचेकडुन पंचा समक्ष ५ लाख रुपये स्वीकारताच त्यास लाच रकमेसह पकडण्यात आले. पोनी खाडे सहायक फौजदार जाधवर व खाजगी इसम कुशाल जैन यांचे विरुद्ध पोलीस स्टेशन बीड शहर येथे गुन्हा दाखल करण्याची प्रक्रिया सुरु आहे .
सदरची कारवाई सापळा अधिकारी लाच लूचपत प्रतिबंधक विभाग बीड चे पोलीस उपअधिक्षक शंकर शिंदे, सह सापळा अधिकारी पोलीस निरीक्षक युनुस शेख आणि पोलीस निरीक्षक संतोष घोडके, पोलीस निरीक्षक अनिता ईटुबुने( ला.प्र. वि. छत्रपती संभाजीनगर) व सापळा पथकातील कर्मचारी अविनाश गवळी, भरत गारदे,अमोल खरसाडे,अंबादास पुरी, हनुमान गोरे , सुरेश सांगळे, स्नेहल कुमार कोरडे, गणेश मेहेत्रे निकाळजे व नेहरकर यांनी केली.
