MahaTimes समर्थकांचा आनंद शिगेला, भव्य मोटारसायकल रॅलीचे आयोजन
By MahaTimes ऑनलाइन |
बीड : जिल्हाध्यक्ष पदावर नियुक्ती झाल्यानंतर आ. संदीप क्षीरसागर पहिल्यांदाच जिल्ह्यात आल्याने कार्यकर्त्यांकडून, त्यांचे जोरदार स्वागत करण्यात आले. आपल्या नेत्याकडे जिल्ह्यातील पक्षाची धुरा आल्यामुळे समर्थकांच्या महत्वकांक्षा वाढल्या आहेत. कार्यकर्ते व समर्थकांचा आनंद शिगेला गेल्याचे चित्र आहे. तसेच आता जिल्ह्यात पक्षवाढीची रणनिती आखण्यासाठी आज रविवारी (दि.२३) राष्ट्रवादी भवन येथे कार्यकर्ता व पदाधिकारी बैठकही आ.संदीप क्षीरसागर यांनी आयोजित केली आहे.
राष्ट्रवादी काँग्रेस पक्षाचे जिल्हाध्यक्ष आ. संदीप क्षीरसागर शनिवारी जिल्ह्यात आल्यानंतर त्यांनी प्रथमतः आपले स्वतःचे गाव असलेल्या राजुरी (न.) येथे जाऊन ग्रामदैवत श्री मंगलमुर्ती देवस्थान येथे दर्शन घेऊन सर्व नियोजीत कार्यक्रमाची सुरुवात केली. राजुरी तसेच पंचक्रोशीतील गावकऱ्यांनी मोठ्या संख्येने सहभागी होत आ. क्षीरसागरांचे क्रेनच्या सहाय्याने भव्य हार घालून स्वागत व सत्कार केला.
यावेळी आ.संदीप क्षीरसागर यांनी गावाने वेळोवेळी दिलेला आशिर्वाद आणि साथ याबद्दल सामुहिक रित्या ऋण व्यक्त केले. सर्वांशी संवाद साधून पुन्हा एकदा, पक्षाची मोठी जबाबदारी पार पाडण्यासाठी आपल्या आशिर्वाद आणि साथीची गरज मला आहे, अशी भावना व्यक्त केली. आ.क्षीरसागरांनी आपल्या आईच्या समाधीस्थळी जाऊन अभिवादन केले व आशिर्वाद घेतले. यानंतर आ.संदीप क्षीरसागर बीड शहरात दाखल होताच फटाके वाजवून, घोषणाबाजी करत कार्यकर्त्यांनी त्यांचे जोरदार स्वागत केले.
आता जिल्ह्याला लक्ष करुन कामाला लागू-आ.क्षीरसागर
आपला बीड जिल्हा मा.पवार साहेबांना मानणारा आहे. आपण जरी एकटे पडलो असलो तरी आपल्या बीड मतदारसंघाची ताकद प्रचंड आहे. आपल्या कार्यकर्त्यांना आता मतदारसंघासोबतच संपूर्ण बीड जिल्ह्याला लक्ष करून येणार्‍या निवडणूकांच्या अनुषंगाने जोमाने कामाला लागावे लागेल. आपण संपूर्ण ताकदीनिशी पक्षाचे काम जिल्हाभर करू असे आ.क्षीरसागर यांनी कार्यकर्त्यांना सांगितले.
एकनिष्ठ, एकवचनी संदीप भैय्या -महेबुब शेख
सगळे गेले, पण न डगमगता येईल त्या संकटाला तोंड देण्याची तयारी ठेऊन संदीप भैय्या भक्कमपणे पक्षासोबत उभे राहिले आहेत. संदीप भैय्या खरे एकनिष्ठ आणि एकवचनी आहेत. अशी प्रतिक्रिया राष्ट्रवादी युवक काँग्रेसचे प्रदेशाध्यक्ष महेबुब शेख यांनी दिली.
भव्य बाईक रॅली व महापुरूषांना अभिवादन
छत्रपती शिवाजी महाराज चौक ते डॉ.बाबासाहेब आंबेडकर आ.संदीप क्षीरसागरांनी यांच्या पुतळ्यापर्यंत कार्यकर्त्यांकडून भव्य मोटारसायकल रॅलीचे आयोजन करण्यात आले होते. दरम्यान आ.क्षीरसागर यांनी बीड शहरातील सर्व महापुरुषांच्या पुतळ्यांच्या ठिकाणी जाऊन, पुष्पाहार अर्पण करून अभिवादन केले.