भरधाव कारचा भीषण अपघात : तीन ठार

मित्राच्या लग्नाला जाताना काळाचा घाला

By MahaTimes ऑनलाइन |

बीड : भरधाव वेगातील कारचा भीषण अपघात झाला. यात नेवासा (अहमदनगर) येथील तिघांचा जागीच मृत्यू झाला. तर एकजण गंभीर जखमी आहे. कार वरील चालकाचे नियंत्रण सुटल्याने गाडीने तीन-चार पलट्या मारल्या. ही घटना पेंडगावजवळ घोसापुरी शिवारात आज (ता. 23) पहाटे सव्वा दोनच्या सुमारास घडली.

नेवासा येथून मित्राच्या लग्नाला बीडकडे येत असताना पेंडगाव जवळ कार (एम. एच. 17 बी. व्ही. 9673 ) चालकाचे नियंत्रण सुटल्याने गाडीने तीन-चार पलट्या घेत कार रस्त्याच्या बाजूला जाऊन उलटली. अपघात ऐवढा भीषण होता की यात कारचा अक्षरशः चुराडा झाला आहे. धीरज गुणदेजा (वय 30), रोहन वाल्हेकर (वय 32), विवेक कागुने (वय 33 ) अशी मृतांची नावे आहेत. तर आनंद वाघ (वय 28) हा गंभीर जखमी असून त्याच्यावर बीड जिल्हा रुग्णालयात उपचार सुरु आहेत. हे सर्व अहमदनगर जिल्ह्यातील नेवासा येथील रहिवासी आहेत.

घटनेची माहिती मिळताच महामार्ग वाहतूक पीएसआय घोडके, रवींद्र नागरगोजे, बीड ग्रामीण पोलीस स्टेशनचे लक्ष्मण जायभाये, रवी सानप तसेच महामार्ग पेट्रोलिंग टीमचे प्रमुख प्रतीक कदम, सुनील कवडे, राम गायकवाड तसेच महामार्ग रुग्णवाहिका डॉक्टर विशाल डोंगर, यशवंत शिंदे, ड्रायव्हर सुभाष नन्नवरे यांनी घटनास्थळी धाव घेतली.