अंगाला धक्का लागताच डोक्यात काठी घालुन जीवे मारले!

आरोपीने स्वत: ठाण्यात येऊन दिली कबुली

By MahaTimes ऑनलाइन |

बीड : अंगाला धक्का लागल्याच्या शुल्लक कारणावरून म्हणून दोघात वाद झाला. हा वाद एवढा टोकाला गेला की, यात एकाचा बळी गेला. ही धक्कादायक घटना सिरसाळा (ता. परळी) येथे घडली असून स्वत: आरोपीने पोलीस ठाण्यात हजर होवून खून केल्याची कबुली दिली आहे. या घटनेने सर्वत्र खळबळ उडाली असून पोलीस अधिक तपास करत आहेत.

प्राप्त माहितीनुसार, परळी शहरातील रहिवाशी आरोपी भुजंग वाघमारे (वय 30) हा चार महिन्यापूर्वी सिरसाळा येथून परळीकडे जात होता.  यावेळी सिरसाळा येथील डॉ. बाबासाहेब आंबेडकर चौकात एका अज्ञात व्यक्तीचा अंगाला धक्का लागला. यावरून दोघांत वाद निर्माण झाला. दरम्यान मयताने भुषण वाघमारे यास शिवीगाळ केली.

याचा राग आल्याने आरोपी भुषण वाघमारे याने सदरील तरु णाच्या डोक्यात लाकडी काठी घातली. यात तो बेशुद्ध होवून खाली कोसळला. त्यानंतर वाघमारेंनी त्यास रस्त्याच्या बाजूला असलेल्या महावितरण कंपनीच्या जुन्या इमारतीतील दुस-या मजल्यावरील खोलीत नेवून टाकले. हा बेशुद्ध पडला असून सकाळी शुद्धीवर येईल, असे वाटल्याने तिथेच सोडून वाघमारे निघून गेले.

तब्बल चार महिन्यानंतर वाघमारे याने इमारतीत जावून पाहिले तर सदरील इसमाचा कुजलेल्या अवस्थेत मृतदेह आढळून आला. हे पाहुन वाघमारे पुरता हादरून गेला. मात्र, त्यास पश्चाताप झाला. तो सरळ सिरसाळा पोलीस ठाण्यात जावून घडलेली सर्व हकीकत कथन केली तेंव्हा पोलिस ही चक्रावुन गेले. मयताची ओळख पटलेली नसून सिरसाळा पोलीस अधिक तपास करत आहेत.