अविस्मरणीय शिवजयंतीचे साक्षीदार व्हा -आ.संदीप क्षीरसागर

यावर्षी 10 विदेशी फायर आर्टिस्ट उत्सवामध्ये सादरीकरण करणार; महिला भगिणींची, ज्येष्ठांकरिता बसण्याची विशेष व्यवस्था

By MahaTimes ऑनलाइन |

बीड : मागील अनेक वर्षापासून बीड शहरामध्ये सार्वजनिक शिवजयंती उत्सव समितीच्या वतीने अविरत व अखंड शिवजयंती साजरी करण्यात येते. या शिवजयंतीच्या माध्यमातून बीड शहरातील नागरिकांना विविध संस्कृतिक कला दाखवण्याचा प्रयत्न केला जातो. यापूर्वी अनेक राज्यातून आलेल्या कलाकारांनी त्यांची सांस्कृतिक कला व तेथील चित्तथरारक मैदानी खेळ बीड शहरातील जनतेला दाखवले होते. यावर्षी 10 विदेशी फायर आर्टिस्ट युक्रेन, रशिया, मेक्सिको, ऑस्ट्रिया बहुराष्ट्रीय कलाकार हे सर्व सार्वजनिक शिवजयंती उत्सवामध्ये सादरीकरण करणार असल्याची माहिती सार्वजनिक शिवजयंती उत्सव समितीचे मार्गदर्शक आ.संदीप क्षीरसागर यांनी दिली.

उद्या दि.19 फेब्रुवारी 2023 रोजी सुर्योदया बरोबर सकाळी 6.45 वाजता शासकीय महापुजा होणार आहे. या शासकीय महापुजेला बीडचे जिल्हाधिकारी दिपाताई मुधोळ-मुंडे, पोलीस अधिक्षक नंदकुमार ठाकुर, मुख्य कार्यकारी अधिकारी अजित पवार, सुरेश साबळे जिल्हा शल्यचिकित्सक,जि.रू.बीड, नामदेव टिळेकर प्रशासक,न.प.बीड, निताताई अंधारे मुख्याधिकारी,न.प.बीड, यांच्यासह प्रशासनातील अधिकार्‍यांची उपस्थिती राहिल. तर प्रमुख पाहुणे म्हणुन बारामती अ‍ॅग्रीकल्चर डेव्हलपमेंच्या विश्वस्त/सचिव तथा आ.रोहित दादा पवार यांच्या मातोश्री सुनंदाताई राजेंद्र पवार या प्रमुख अतिथी म्हणुन उपस्थित असणार आहेत.

सार्वजनिक शिवजयंती उत्सव समितीचे अध्यक्ष, जिल्हाधिकारी, पोलीस अधिक्षक यांच्या हस्ते शासकीय महापुजा होणार आहे. तसेच संभाजी महाराज क्रीडांगण येथे सायंकाळी 5 ते रात्री 10 च्या दरम्यान नामांकित करवीर ढोल पथक, केरळचे शबरी चेंडे नृत्य, विदेशी कलाकारांचा फायर शो, पंजाबचा प्रसिद्ध वीर खालसा कला, केरळचे शबरी चेंडे नृत्य व शेवटी 650 वादकांनी सज्ज असा ढोल व झांज पथक देखील आपल्या पारंपारिक वाद्यांच्या माध्यमातून आपली कला सादर करणार आहेत.

कार्यक्रमस्थळी महिला भगिणी, ज्येष्ठ नागरिक व महिला यांच्या विशेष आसन व्यवस्था करण्यात आली असून याची मार्गिका सागर हाईटच्या बाजूस व स्काऊटभवनच्या मागील रोड एचडीएफसी बँकेच्या शेजारी येथुन विशेष गेट फक्त महिला भगिणी यांच्यासाठी राखीव असणार आहे. दि.19 फेब्रुवारी रोजी छत्रपती शिवाजी महाराजांच्या जयंती निमित्त सायंकाळी पाच वाजता वरील सर्व कलाप्रकार छत्रपती शिवाजी महाराजांच्या चौकातील छत्रपती संभाजी महाराज क्रीडांगणावर पार पडणार आहेत.

बीड शहरातील व जिल्ह्यातील तमाम नागरिकांनी या सांस्कृतिक व चित्तथरारक कार्यक्रमांना शासनाने सांगितलेल्या कोरोना नियमांचे पालन करत आपली उपस्थिती नोंदवावी असे आवाहन सार्वजनिक शिवजयंती उत्सव समितीचे मार्गदर्शक आ.संदीप भैया क्षीरसागर यांनी केले आहे.

बारामतीच्या सौ.सुनंदाताई पवार असणार प्रमुख पाहुणे

सालाबादप्रमाणे यावर्षीही शिवजयंती निमित्त छत्रपती संभाजी महाराज क्रीडांगण येथे विविध सांस्कृतिक कार्यक्रमाचे आयोजन केले आहे. या कार्यक्रमास प्रमुख पाहुणे म्हणून बारामती एग्रीकल्चर डेव्हलपमेंटच्या विश्वस्त/सचिव तथा आ.रोहित पवार यांच्या मातोश्री सौ.सुनंदाताई राजेंद्र पवार या उपस्थित राहणार आहेत. या बरोबरच विदेशी कलाकारासह विविध क्षेत्रात कार्यरत असलेल्या कर्तृत्ववान महिलांचे ढोल पथक हे असणार आहे. यावर्षी माताभगिनी, युवती, ज्येष्ठ महिलाांना कार्यक्रमस्थळी बसण्याची विशेष व्यवस्था व सागर हाईटपासून स्काऊट भवन रोड, एचडीएफसी बँकच्या बाजुने महिलांकरीता एक विशेष गेट ठेवण्यात आले असून यातून फक्त महिलांनाच प्रवेश असणार आहे. तरी या कार्यक्रमाचा सर्वांनी लाभ घ्यावा असे आवाहन सौ.नेहाताई संदीप क्षीरसागर यांनी सार्वजनिक शिवजयंती उत्सव समितीच्या वतीने केले आहे.

Advt