MahaTimes वंचित, उपेक्षितांच्या चेहऱ्यावर आनंद फुलवला – महादेव महाराज चाकरवाडीकर
राजयोग फाउंडेशन आणि रोटरी क्लबचा स्तुत्य उपक्रम
By MahaTimes ऑनलाइन |
बीड : राजयोग फाउंडेशन आणि रोटरी क्लब ऑफ बीड मिड टाउन यांच्या संयुक्त विद्यमाने शनिवार (दि.22) रोजी धनत्रयोदशीच्या शुभ मुहूर्तावर सकाळी 11 वाजता गोरगरिबांची दिवाळी फराळ वाटप करून गोड केली. बीड शहरच नव्हे तर जिल्ह्यातील ग्रामीण भाग आणि तब्बल 12 विविध आश्रमातील बेघर कुटुंबीयांसह वंचित उपेक्षित पीडित दिव्यांग अशा सुमारे 3100 पेक्षा कुटुंबांना दिवाळी फराळ सह दर्जेदार वस्तूंची किट मान्यवरांच्या शुभहस्ते वाटप करून गोरगरिबांची दिवाळी गोड केली. राजयोग फाउंडेशन आणि रोटरी क्लबने मागील सहा वर्षापासून वंचित, उपेक्षित, पीडित कुटुंबियांची दिवाळी सातत्याने अशा स्तुत्य उपक्रमातून गोड केली. हे काम सोपे नाही. अशा कामातून निश्चितच मोक्ष प्राप्त होतो असे आशीर्वचन ह भ प महादेव महाराज चाकरवाडीकर यांनी आपल्या मनोगतातून व्यक्त केले.
या स्तुत्य कार्यक्रमाचा शुभारंभ महादेव महाराज चाकरवाडीकर यांच्या शुभहस्ते झाला. यावेळी राजयोग फाऊंडेशन चे संस्थापक दिलीप धुत यांच्यासह व्यासपीठावर जिल्हा परिषदेचे शिक्षणाधिकारी विक्रम सारूक, बीड शहर पोलीस ठाण्याचे पोलीस निरीक्षक रवींद्र सानप, उपनिरीक्षक घनश्याम अंतराम, रामेश्वर मते महाराज, रोटरी क्लब ऑफ बीड मिडटाउनचे अध्यक्ष सुनील पारख, सचिव बालाजी घरत, हरिष मोटवाणी, सुर्यकांत महाजन, दिनेश लोळगे, पत्रकार संघाचे विभागीय अध्यक्ष वैभव स्वामी, कार्यक्रमाचे संयोजक नगरसेवक शुभम धूत आदी मान्यवरांची प्रमुख उपस्थिती होती.
पुढे बोलताना ह भ प महादेव महाराज चाकरवाडीकर म्हणाले, दरवर्षीप्रमाणे यावर्षी देखील धूत परिवाराने पुढाकार घेऊन गोरगरिबांची दिवाळी गोड करणारा हा अलौकिक उपक्रम राबवला. भौतिक प्रगती करण्याचा प्रयत्न प्रत्येक व्यक्ती करतो. धनसंपत्ती कमावणे हे प्रत्येकाचेच कर्तव्य आहे. त्यांनी ते केले पाहिजे. मात्र त्या धनसंपत्तीचा विनीयोग हा सुयोग्य होणे गरजेचे आहे. दिलीप धूत परिवाराने कायम नीती आणि सेवा जोपासली. आपल्यातील आनंद इतरांना वाटायचा, दुःखी पीडितांचे अश्रू आपल्या हाताने पुसायचे हे काम साधे सोपे नाही. ते कोणीही करू शकत नाही.त्यासाठी धूत परिवारा सारखे निस्वार्थ जगता आले पाहिजे. अशा प्रामाणिक सेवेतून खरा मोक्ष आनंद प्राप्त होतो. त्यामुळे हा उपक्रम उत्तरोत्तर वाढत आहे. परमार्थाचे हे वैभव असेच कायम वाढो आणि सर्वांची दिवाळी सुख-समृद्धीची जावो. राजयोग फाउंडेशन आणि रोटरी क्लबच्या या उपक्रमाला कायम बळ मिळो असे शुभाशीर्वाद आपल्या मनोगततून महाराजांनी दिले.
याप्रसंगी बीड शहर पोलीस ठाण्याचे पोलीस निरीक्षक रवींद्र सानप म्हणाले, दिलीपशेठ धूत यांच्या सामाजिक कार्याचा वारसा शुभम यांनी सक्षमपणे स्वीकारला म्हणूनच हा उपक्रम उत्तरोत्तर प्रगती करत आहे आणि पिढीतांचे अश्रू पुसत आहे. याबद्दल कौतुक करावे तेवढे कमीच आहे. जिल्हा परिषदेचे शिक्षणाधिकारी ह भ प विक्रम सारूक म्हणाले, आनंद सुख हे इतरांना दिल्यावर वाढते. दीनदुबळ्यांची सेवा हीच खरी ईश्वरी सेवा आहे आणि ही ईश्वरी सेवा राजयोग फाउंडेशनच्या माध्यमातून दिलीप शेठ धूत यांचा परिवार करत आहे. ही बाब निश्चितच अभिनंदन आहे.रोटरी क्लबचे अध्यक्ष सुनील पारख म्हणाले, गोरगरिबांची दिवाळी गोड करण्याचा संकल्प या माध्यमातून पूर्ण होत आहे. याचे सातत्याने समाधान मिळते. हे समाधान इतर कोणत्याही संपत्तीतून मिळणे शक्य नाही. याप्रसंगी सूर्यकांत महाजन म्हणाले, नगरसेवक शुभम धूत आणि त्यांची टीम गोरगरिबांची दिवाळी गोड व्हावी त्यासाठी अनेक दिवसापासून 24 – 24 तास परिश्रम घेतात. म्हणूनच हा उपक्रम दरवर्षी आपली उंची वाढवत आहे. ही बाब निश्चितच कौतुकास्पद आहे. या उपक्रमाच्या माध्यमातून जवळपास 15000 व्यक्तींची दिवाळी गोड झाल्याने या स्तुत्य उपक्रमाचे सर्व स्तरातून कौतुक होत आहे.
यावर्षी 3100 कुटुंबीयांची दिवाळी गोड करता आली याचा मनस्वी आनंद – शुभम धूत
राजयोग फाउंडेशनच्या माध्यमातून मागील सहा वर्षापासून सातत्याने गोरगरिबांची दिवाळी गोड करण्याचा प्रयत्न सन 2017 पासून सुरू केला. पहिल्या वर्षी 1000 गोरगरीब गरजूवंत कुटुंबीयांची दिवाळी गोड केली. यातून जो आनंद मिळाला तो आनंद आयुष्यातील सर्वोच्च ठरला. तेव्हापासून दरवर्षी हा उपक्रम राबवण्याचा संकल्प राजयोग फाउंडेशनचे संस्थापक दिलीपजी धूत यांच्या संकल्पनेतून राबवण्याचा निर्धार केला. दरवर्षी या उपक्रमामध्ये वाढ होत होत यावर्षी 3100 पेक्षा अधिक कुटुंबीयांची दिवाळी गोड करता आली याचा मनस्वी आनंद होत आहे. बीड जिल्ह्यातील विविध बारा आश्रमातील अबाल वृद्ध तसेच बेघर निराधारांना देखील दिवाळी भेट देऊन त्यांची दिवाळी गोड करण्याचा प्रयत्न करतांना घरची दिवाळी साजरी केल्याचा आनंद या माध्यमातून मिळतो. तो आयुष्यातील सर्वोच्च आनंद देणारा क्षण ठरतो असे मत आपल्या प्रास्ताविकात कार्यक्रमाचे संयोजक नगरसेवक शुभम धूत यांनी व्यक्त केले.
