ओला दुष्काळ जाहीर करून सरसकट मदत द्या, अन्यथा रस्त्यावर उतरू

मौलाना आझाद युवा मंचचे जिल्हाध्यक्ष नुमान अली चाऊस यांचा इशारा

By MahaTimes ऑनलाइन |

बीड ( माजलगाव ) : परतीच्या पावसाने बीड जिल्ह्यात हाहाकार उडवून सोडला. खरीपाचे पिके अक्षरश: पाण्यात गेले. अशी गंभीर परिस्थिती आणि शेती पिकाचे भयंकर नुकसान झाल्यानंतरही शासन-प्रशासन नुकसानीचे पंचनामे करण्याबाबत कागदी घोडे नाचवून ऑनलाईनचा डांगोरा पिटवत आहेत. ओला दुष्काळ जाहीर करून सरसकट मदत द्यावी अन्यथा त्यासाठी रस्त्यावर उतरू असा इशारा मौलाना आझाद युवा मंचचे जिल्हा अध्यक्ष नुमान अली चाऊस यांनी दिला. सरकारने शेतकऱ्यांना सरसकट मदत द्यावी अशी मागणीही त्यांनी केली.

परतीच्या पावसाने जिल्ह्यातील शेतकर्‍यांचे हाल करून सोडली आहे. गेल्या तीन दिवसांच्या कालखंडामध्ये माजलगाव, धारूर, वडवणी, आष्टी, पाटोदा, परळी, अंबाजोगाई, केज, बीड, गेवराईसह आदी तालुक्यांमध्ये धुव्वाधार पाऊस झाला. नद्या नाल्यांचे पाणी शेतात घुसले. सोयाबीन, कापसासह खरीपाचे अन्य पिक अक्षरश: पाण्यात गेले. शेतकर्‍यांची कधीही न भरून येणारी पिकांची हाणी झाली. हातातोंडाला आलेले पीक अक्षरश: उद्ध्वस्त झाले. हे सर्व उघड्या डोळ्याने शेतकरी तर पहातच आहे, गेंड्याची कातडी पांघरलेल्या शासन-प्रशासनालाही ते दिसत आहे मात्र शेतकर्‍यांना आणखी अडचणीत सापडायचे, व त्यांची थट्टा सूरू आहे असे चाऊस यांनी व्यक्त केले.

विमा कंपनी नुकसानीबाबत ऑनलाईन फोटो डाऊन लोड करण्याच्या सूचना देत आहे. शेतकरी बांधावर गेला तर विमा कंपनीचे सर्वर डाऊन राहते. स्वतः ला शेतकऱ्यांचे प्रतिनिधि बोलून मत मागणारे नेते मंडळी व प्रशासनाने विमा कंपनीसह थेट आता शेतकर्‍यांच्या बांधावर जावं, लोकप्रतिनिधी म्हणून मिरवणार्‍यांनी या गंभीर बाबीची दखल घेत स्वत:हून बांधावर जात स्वत:च्या उपस्थिती अधिकार्‍यांसमवेत पंचनामे करावेत अशी मागणी मौलाना आझाद युवा मंचचे जिल्हाध्यक्ष नुमान अली चाऊस यांनी यांनी केली आहे.