MahaTimes रक्तदान शिबीरास उत्स्फुर्त प्रतिसाद, चाहत्यांच्या गर्दीने ‘शिवछत्र’ गजबजले
By MahaTimes ऑनलाइन |
बीड (गेवराई) : बीड जिल्ह्याच्या राजकारणातील ज्येष्ठ नेते माजीमंत्री शिवाजीराव (दादा) पंडित यांच्या वाढदिवसाच्या औचित्याने गेवराई शहरासह संपुर्ण तालुक्यात विविध समाजोपयोगी कार्यक्रम घेवून पदाधिकारी व कार्यकर्त्यांनी दादांचा वाढदिवस साजरा करून त्यांना शुभेच्छा दिल्या. शिवछत्र निवासस्थानी सकाळपासूनच चाहत्यांनी गर्दी केली होती. प्रत्यक्ष, अप्रत्यक्ष आणि सोशल मिडीयाच्या माध्यमातून शिवाजीराव (दादा) पंडित यांच्यावर शुभेच्छांचा वर्षाव करण्यात आला.
माजीमंत्री शिवाजीराव (दादा) पंडित यांच्या वाढदिवसाच्या निमित्ताने गेवराई शहरात अभिष्टचिंतन सोहळ्याचे आयोजन करण्यात आलेले आहे. त्यामध्ये संगीत रामकथा यज्ञ, किर्तन महोत्सव सुरु आहे. या सर्व कार्यक्रमाला उत्स्फुर्त प्रतिसाद मिळत आहे. वाढदिवसाच्या निमित्ताने जय भवानी आणि जगदंबा शिक्षण प्रसारक मंडळाच्यावतीने दादांची ग्रंथतुला करण्यात आली तर यावेळी भव्य रक्तदान शिबीराचे आयोजन करण्यात आले होते. या शिबीरामध्ये २१० रक्तदात्यांनी रक्तदान करून दादांना शुभेच्छा दिल्या.
जय भवानी व जगदंबा शिक्षण प्रसारक मंडळाच्यावतीने शिवशारदा पब्लिक स्कुल येथे दादांची भव्य ग्रंथतुला करण्यात आली. यावेळी विद्यार्थीनींनी दादांचे औक्षण केले. कार्यक्रमात इंग्लिश स्कुलच्यावतीने ‘आमचे प्रेरणास्त्रोत दादासाहेब’ य कविता संग्रहाचे अवलोकन करण्यात आले. वाढदिवसाच्या निमित्तने भित्तीपत्रकाचेही प्रकाशन करण्यात आले. जय भवानी शिक्षण प्रसारक मंडळाच्या कला व विज्ञान महाविद्यालयात संस्थेच्यावतीने रक्तदान शिबीराचेही आयोजन करण्यात आले होते. यावेळी रक्तदान शिबीराचे उद्घाटन युवा नेते रणवीर पंडित यांच्याहस्ते करण्यात आले. यावेळी बोलताना रणवीर पंडित म्हणाले की, रक्तदान हे पवित्र दान आहे, आपल्या रक्ताच्या नात्यापेक्षा रक्तदानाद्वारे एखाद्याला जीवदान दिल्यामुळे जे घट्ट नाते तयार होते ते सर्वात श्रेष्ठ असते. दादांच्या वाढदिवसाच्या निमित्ताने रक्तदान शिबीराचा उपक्रम अत्यंत स्तुत्य असून प्रत्येक शाळा महाविद्यालयाने अशा सामाजिक उपक्रमाचे आयोजन केले पाहिजे असेही ते म्हणाले.
यावेळी युवा नेते पृथ्वीराज पंडित, गढीचे सरपंच अंकुश गायकवाड, वडगाव ढोकचे सरपंच रमेश नेहरकर, मंगेश कांबळे, पाराजी मोटे, रामदास मुंढे, विश्वांभर कदम, लहू ढाकणे, प्रथमेश वाव्हळ, बीड जिल्हा रुग्णालयाचे डॉ. पी.व्ही.जाधव, डॉ. सिराज शेख, डॉ. संजय मिसाळ, संस्थेचे प्रशासकीय अधिकारी प्रमोद गोरकर, प्रा.काशिनाथ गोगुले, प्राचार्य सदाशिव सरकटे यांच्यासह पदाधिकारी व कार्यकर्ते उपस्थित होते. या शिबीरामध्ये दिवसभरात २१० रक्तदात्यांनी रक्तदान करून शिवाजीराव (दादा) पंडित यांना सदिच्छा दिल्या. यावेळी संस्थेचे प्रशासकीय मंडळ, शिक्षक, प्राध्यापक, शिक्षकेत्तर कर्मचारी मोठ्या संख्येने उपस्थित होते.
शिवाजीराव (दादा) पंडित यांच्या वाढदिवसानिमित्तने लोणी शहाजानपूरचे सरपंच भरत मते यांनी गावातील महिलांना १०० साड्यांचे वाटप करण्यात आले. यावेळी शिवाजीराव (दादा) पंडित यांच्याहस्ते प्रातिनिधीक स्वरुपात साड्या वाटप करण्यात आल्या. यावेळी सुनिल पाटील, रामकृष्ण आबुज, रामदास मते, कारभारी मते, बाबा माने यांच्यासह लोणी शहाजानपूर येथील ग्रामस्थ उपस्थित होते. ग्रामस्थांच्यावतीने दादांचा यावेळी सत्कार करण्यात आला.
उपजिल्हा रुग्णालयात अन्नछत्र सुरु
शिवशारदा मल्टिस्टेटच्यावतीने शिवाजीराव (दादा) पंडित यांच्या वाढदिवसानिमित्ताने मागच्या वर्षीपासून गेवराई उपजिल्हा रुग्णालयात अन्नछत्र सुरु आहे. वाढदिवसाच्या औचित्याने यावर्षीही हे अन्नछत्र अखंडपणे चालू ठेवण्याचा निर्णय मल्टिस्टेटच्यावतीने घेण्यात आला. अन्नछत्रच्या वर्षपूर्तीच्या निमित्ताने युवा नेते रणवीर पंडित यांनी उपजिल्हा रुग्णालयाला भेट देवून रुग्णांना फराळाचे वाटप करण्यात आले. यावेळी जि.प.चे सभापती बाळासाहेब मस्के, दत्ता दाभाडे, अक्षय पवार, रणजित पंडित यांच्यासह रुग्णालयातील डॉक्टर, परिचारिकासह राष्ट्रवादी काँग्रेस पक्षाचे पदाधिकारी, कार्यकर्ते उपस्थित होते.
दरम्यान शिवाजीराव (दादा) पंडित यांच्या वाढदिवसानिमित्ताने सकाळपासूनच त्यांच्या शिवछत्र निवासस्थानी चाहत्यांनी गर्दी केली होती. यावेळी राजकीय, सामाजिक आदी विविध क्षेत्रातील पदाधिकारी, कार्यकर्ते मोठ्या संख्येने उपस्थित होते. यावेळी अभिष्टचिंतन सोहळा समितीच्यावतीनेही दादांचा सत्कार करण्यात आला. भवानी बँकेच्यावतीनेही शिवाजीराव (दादा) पंडित यांचा सत्कार करून त्यांना शुभेच्छा देण्यात आल्या.
