गोदावरी नदी काठच्या गावांना सावधानतेचा इशारा

नदी पात्रामध्ये 9432 क्युसेक्सने पाण्याचा विसर्ग, नदीपात्रात कुणीही जाऊ नये– जिल्हाधिकारी

By MahaTimes ऑनलाइन | बीड

जायकवाडी प्रकल्पाच्या पाणलोट क्षेत्रात चांगला पाऊस होत असून, त्यामूळे पाणलोट क्षेत्रातील नदी, नाल्यांव्दारे जायकवाडी धरणात पाण्याची आवक वाढत असल्याने पाणी पातळी वाढत आहे. गोदावरी नदी काठच्या दोन्ही तीरावरील गावांना सावधानतेचा इशारा देण्यात आला आहे.

त्यामुळे आज 25 जुलै 2022 रोजी सायंकाळी 6 वाजेपासून धरणाच्या गेटमधून सांडव्याव्दारे गोदावरी नदी पात्रामध्ये 9432 क्युसेक्सने पाण्याचा विसर्ग करण्यात येत आहे, असे पुर नियंत्रण कक्ष, जायकवाडी प्रकल्प, पैठण यांनी कळविले आहे.

तसेच पाण्याची आवक लक्षात घेऊन विसर्ग कमी / जास्त करण्यात येणार आहे. तरी गोदावरी नदी काठच्या दोन्ही तीरावरील लोकांना सतर्क राहणेबाबत तसेच नदीपात्रात कुणीही जाऊ नये, पाळीव प्राणी, गुरेढोरे, विद्युत मोटारी व तत्सम साहित्य इ. तात्काळ काढून घेण्याबाबत तसेच कुठलीही जीवित वा वित्तहानी होणार नाही. याबाबत उक्त गावांना तात्काळ सावधानतेचा इशारा देण्यात येत आहे, असे जिल्हाधिकारी राधाबिनोद शर्मा यांनी प्रसिध्दी पत्रकाव्दारे कळविले आहे.