बीडमध्ये तरुणाचा संशयास्पद मृत्यु

हत्या की आत्महत्या, गूढ कायम

मृतदेहाजवळ आढळले गावठी पिस्तूल

By MahaTimes ऑनलाइन | बीड

शहरातील स्वराज्यनगर भागात बुधवारी सकाळी (८ जून ) रोजी एका तरुणाचा मृतदेह आढळून आल्याने एकच खळबळ उडाली आहे. मृतदेहाजवळ गावठी पिस्तूल मिळून आल्याने ही हत्या की आत्महत्या असा प्रश्न उपस्थित झाला आहे.

प्राप्त माहितीनुसार, अक्षय कोंडीराम भांडवले (२०, रा.बार्शी नाका, तेलगाव रोड, बीड) हा शहरातील एका ऑइल मिलमध्ये काम करायचा. ७ जून रोजी रात्री तो नित्याप्रमाणे घरी पोहोचला नाही. त्यामुळे कुटुंबीयांनी रात्री साडेआठ वाजता संपर्क केला. यावेळी घरी यायला किती वेळ आहे, असे आईने विचारले असता, घराकडे येत आहे, असे त्याने सांगितले. मात्र, तो घरी पोहोचलाच नाही. रात्री ११ वाजेनंतर तो फोनही घेईना, त्यामुळे कुटुंबीयांनी मित्रपरिवार, ऑइल मिल व नातेवाईकांकडे चौकशी केली, पण त्याचा ठावठिकाणा लागला नाही. आज ८ सकाळी सात वाजता स्वराज्यनगरातील रिकाम्या प्लाट मधील दाट झाडीत त्याचा मृतदेह आढळून आला. मृतदेहाजवळ गावठी पिस्तूल व दुचाकी मिळून आली. दुचाकीच्या नेमप्लेटवर ऑनलाइन मागविलेल्या पार्सलच्या नावाची पट्टी चिटकवलेली होती. यावरून मयताची ओळख पटली.

सदर घटनेची माहिती मिळताच शिवाजीनगर ठाण्याचे पीआय केतन राठोड, एपीआय मनोजकुमार लोंढे, पोलिस नाईक रवि आघाव, गणेश परजणे, विठ्ठल शिंदे, भगवान घोडके यांनी घटनास्थळी भेट दिली. पंचनामा करुन मृतदेह जिल्हा रुग्णालयात पाठविला. दरम्यान, त्याच्या डोक्याला दोन्ही बाजूंनी छिद्र आहे. हा खून की आत्महत्येचा प्रकार आहे याचा पोलिस , याचा तपास घेत आहे.