गर्भलिंग निदान बाबत गुप्त माहिती देणाऱ्यास मिळणार 1 लाख रुपयांचे बक्षीस

जिल्हा शल्यचिकित्सक डॉ. एस.ए.साबळे यांची माहिती

By MahaTimes ऑनलाइन | बीड

पीसीपीएनडीटी कायद्याचे उल्लंघन तसेच बेकायदेशिरपणे गर्भलिंग निदान बाबत गुप्त माहिती देणाऱ्या व्यक्तीस पीसीपीएनडीटी कायद्याअंतर्गत शासनाच्या खबरी योजनेमधून 1 लाख रुपयांचे बक्षीस देण्यात येत असल्याची माहिती जिल्हा शल्य चिकित्सक डॉ. एस.ए.साबळे यांनी दिली आहे.

पीसीपीएनडीटी कायद्याचे उल्लंघन करणाऱ्या तसेच बेकायदेशिरपणे गर्र्भलिंग निदान करणाऱ्या सोनोग्राफी केंद्र, व्यक्ती किंवा डॉक्टर संस्था यांची गर्भलिंग निदान बाबत गुप्त माहिती जिल्हा शल्य चिकित्सक, (जिल्हा सामुचित प्राधिकारी) जिल्हा रुग्णालय व वैद्यकीय अधिक्षक उपजिल्हा रुग्णालय व ग्रामीण रुग्णालयांना द्यावी किंवा हेल्पलाईन क्रमांक 18002334475 या क्रमांकावर तक्रार नोंदविता येईल.

तसेच माहिती देणाऱ्या व्यक्तीचे नाव गोपनीय ठेवण्यात येईल, सदर माहिती खातरजमा करुन व त्या अनुषंगाने संबंधित सोनोग्राफी केंद्र, व्यक्ती किंवा डॉक्टर संस्था यांचेवर न्यायालयीन प्रकरण दाखल केल्यानंतर संबंधित तक्रारदारास 1 लाख रुपयांचे बक्षीस शासनामार्फत देण्यात येईल असे, जिल्हा शल्य चिकित्सक एस.ए. साबळे बीड यांनी कळविले आहे.